قد لي ثلاث ايّام ( مجاراة )

الثلاثاء ديسمبر 18, 2018 9:04 pm

تشرفت بكم جميعا وبمجاراتكم

اعتذر من أصحاب المشاركات الغير موزونه

البحر ( المسحوب )

مستفعلن مستفعلن فاعلاتن

ابـيــات الـمـجــاراة

قد لي ثلاث ايام يا ناس سهران

مدري !! علام النوم عيّا يجيني

اروح وارجع تايه الفكر حيران

ما غير افاخت من يسار ويميني

والمضحك المبكي من الواقع الآن

ادوّر الأشياء وهي في يديني!!

‎#سليمان_الشاردي

______________

الابيات المشاركة في المجاراة

______________

1

‏‎‎‏‎الوضع واضح للعرب يا سليمان

سهران من كثر الوله والحنيني

لكن تمسك بالصبر ياكحيلان

وندعي على بلواك ربي يعيني

ترا الزمن ماهو موقف على انسان

لو انه اغلى من نظر نون عيني

‎#غيـم

______________

2

‏‎العشق طعمه سم لاصرت عشقان

وان كنت عاشق روح لا تبتليني

اشوف بيته سجن من غير بيبان

ف البرد ارقف منه ويندى جبيني

والي بقى من سيرته ياسليمان

يلعب على المسحوب لعب الهجيني

#خالد_بن_عيد

______________

3

‏‎‎الوضع هذا دارج بكل انسان

حتى صغير السن شفته بعيني

لا تاه قلبك مايفيدن الاعيان

هذى مثل دارج وظنه يقيني

لكن !! ياسليمان ! أغديك هويان ؟

ترى الهوى شره وخيره يبيني !!

‎#عبد_الودهي

______________

4

‎‏‎ها ذي علامات الكبر ..ياسليمان

سوي رياضه وعْضلاتك. تليني

شوف النوادي ماليه كل الاركان

سجل بإحداها اذا انك فطيني

تتنشط الأعضاء والذاكرة تصان

والنوم ياتيلك سريعاً وزيني

‎#رباب

______________

5

‏‎‎وشلون من يسهر على طول مرضان ؟

ماغمضت عينه ولا له عويني

حتى المسكّن نفعته نوب واحيان

من شدّة اوجاعه كلامه ونيني

عسا الذي انزل تبارك والإنسان

ينزل عليه العافيه واليقيني

‎#مسك

______________

6

الله يرحم حالك وحال من كان

وعزي لمن مثلك يجر الونيني

النوم يجفي العين لا صرت مرضان

والا من مفارق عزيز وحزيني

يدق هوجاس السهر بين الاعيان

ويذكرك وقتاً مضى من سنيني

#عقد_لولو

______________

7

‏‎ترى السَّهَر ما هوب صحه للابدان

ولا تشتكي مما شكت منه عيني

حِيرٓتك هذي حٓيَّرَت كل ولهان

وملامح العاشق بنظره تبيني

غٓيِّر برستيج السَّهَر قدر الامكان

ولملم شتات اللي مضى من سنيني

‎#حروف_المشاعر

______________

8

‏‎يا مدوّر الحاجه وهي بين الأعيان

وش لك من اللي بالحنايا دفيني

كانك ثلاث ايام تسهر ومشتان

أنا شهور !! تحايل النوم عيني

وان كان تجهل ليه تسهر وبلشان

ليتي جهلت المشكله في يقيني

فـ غياب من حبه لو أخفيته يبان

وادري معادهـ راجعٍ لو يبيني!!

‎#صروووف

______________

9

ياللي شكيت الهم السهْر عنوان

وتقول جـور الوقت بـيّـح كنيني

اذكر إلـٰه الكون في كل الاحيان

وادعي على الظلّام والحاسديني

وخذ فرصتك والعمر رحله وميدان

مابين طيش وبين عـقـلٍ رزيني

سج القدم لاصرت بالوضع بلشان

الله مـوسّـعـها علـى الـعالمـينـي

والدار من عقب المطر جوها زان

ممشن بها ينسيك همَّ السنيتي

#نوره_العطاوي

______________

10

‏‎يقولون في الأمثال والنوم سلطان

ما عاد هو يأمر على العاشقيني

يا صاحبي خذ الخبر دون إعلان

مني وأنا لك عون وانته عويني

طاري السفر يخلّي القلب طربان

ويزيح عن خاطرك همَّ السنيني

‎#امس_الحنين

______________

11

‏‎‎ماني بشاكي همَّ قلبي على انسان

لو ( السهر ) ربّع وقيّض بعيني

دام الحكي والصمت في كف ميزان

رجّحت صمتي عن فرح شامتيني

ياخف همَّ القلب لو وزنه اطنان

ويا ثقل كلمه في شماته تجيني

#موج_القصيد

______________

12

‏‎مبطي وقلبي بالهواجيس بلشان

لكنْ محد يسمع بكايّ وْ ونيني

ما نيب متشرّهـ ولا نيب عتبان

الله على جور الليالي عَويني

يالشاردي في ذمتي بعض الاحيان

انشد عن أسمي وأهليّ وْ والديني

#سارهه_الحربي

______________

13

‏‎يالشاردي معذور من قلب ولسان

مرفوع عنك اللوم والله يعيني

الوضع متغيّر ما هو مثل ما كان

واللي نشوفه يندىٰ منه الجبيني

انعايش الواقع على قدر الامكان

والّا علىٰ الماضي يلجَّ الحنيني

#معجب

______________

14

‏‎من يترك الواقع وينساهـ بطران

بطران مالل واقع المستكيني

تارك شريك العمر مضلوم نعسان

وملليت صوت القايله يا ضنيني

غلطان يا شارد على الوهم غلطان

تبحث عن الواقع بمصنوع صيني

خلّك مع الواقع بلا نتّ وادمان

وعايش فعال الواقع المستبيني

لاترتهق وتعيش سهرات وجنان

وتترك وليفك بين دمع وْ حنيني

‎#عاطف_العاطفي

______________

15

‎يالشاردي دنيـا الفـنا شانها شان

لا باح منك الـسدّ .. باح الكنيني

حالك يقول انك من الحب ولهان

ايشوفها غيري وانا اتشوف عيني

اللي يعاني من صدوداً وهجران

يقضي ليالي طرف عينه حزيني

#ريف_شمران

______________

16

‏‎يالله وانا طالبك يا وال الاحسان

ترفق بحاله يوم باح .. الكنيني
يقول عيني عافت النوم سهران

تايه ولا ادري عن امرٍ يجيني
العلم يابن الشاردي واضح وبان

دامك وصلت لحالة التايهيني

هذا الهوى ما فيه شكٍ وبهتان

والله على سهر الليالي يعيني
#فاقده_غالي
______________
17

ما عندك ازهيمر ولا فيك نسيان

ما غير خايف وقعتك بالكميني

احذر تحصن وأقرأ طـٰه والانسان

وايضا اذكر الاوراد في كل حيني

بعطيك رموز وانته لها حيل فهمان

بخبرتي من ما مضى من سنيني

#احمد_الشيخي

______________

18

‏‎الواقع ان محزمك بالشعر مليان

قرم و ليا جت للمواقف عويني

والمبكي انّي خابرك شخص بطران

وش بك عسى ما شر يا بعد عيني

ما لك سوا دعوة قديرٍ و منّـان

ملاذ من جارت عليه السنيني

هذا كلامي واستمع فيه بإذعان

ويا الله تشفيهم .. و لا تبتليني!!

‎#عمر_الشاردي

______________

19

‏‎تعبان من فرقى المحبين تعبان

ومالي صبر أقوى على افراق حبي

سنْتين قلبي ينوح ويصيح ولهان

أبداً وخلّي ما درى شو فـ قلبي

#عوض_المياسي

______________

تقبلوا تحياتي