يا الله وأنا طالبك يا خير منان
إلهنا لا تفرق إخوان نوره
طب المليك المغرب وطاب سلطان
إثره طبيب له وطبه حضوره
يا مرحبا من قلب وإحساس ولسان
واللي ورى حدب الضلوع محشوره
مشاعر ما تنوصف بقيفان
لأني بشر يمكن يخونه شعوره
شف وجه أبو خالد بالأفراح مليان
لا واهنيه يوم مثلك يزوره
معذور لو ما جيت يا طير حوران
وان جيت باق العالمين معذوره
لا تحسبنك غايب عنه لو كان
نفسه على فرقاك ما هي صبوره
من يوم ودعته هاك اليوم للآن
ما له سوى صورتك في العين صوره
متوكل بالله وفي قلبه إيمان
وذي عادته لو كان نفسه جسوره
يقول والله ما احني الراس لإنسان
وأنا وراي اللي طوال شبوره
اخوي أبو متعب ليا ثار دخان
وجانا نهار يكتشف كل عوره
ما نيب قايل يلحم السيف الأمتان
أقول شوفوا فوق الأسوار سوره
سور ذراه يذري شعوب وأوطان
من قو ساسه شامخات جسوره
زرعت في قلوب البشر بذر الإحسان
وامتد من بين الخلايق جذوره
واليوم تشرح كيف مفهوم الإخوان
بعيد عن حكم البلاد وأموره
جيته تهني بالسلامه وولهان
ودك بشوفه عقب طالت شهوره
الحمد لله من صحيحين الأبدان
والحمد لله زال وضع الخطوره
تبي تشوفه معك في كل ميدان
ينفذ أمرك قبل يعطيك شوره
رفيق دربك من قديمات الأزمان
اللي تعرفه زين وقت الضروره
اليا سهرت ينام وإن نمت سهران
ولا بعد دورك في الوطن غير دوره
من كبر دوره صار للمجد عنوان
ولاّ سنام المجد بابك عبوره
عنوتك هذي ما تقدر بالأثمان
تبطي وهي بين الضلوع محفوره
لا هنت يا رجل المواقف ولا هان
سلمان ابن عبد العزيز اخو نوره