البارحه

الثلاثاء أبريل 09, 2019 5:56 pm

الـبــــارحـــــه

بحر الرجز

مستفعلن مستفعلن مستفعلن

‏الـبارحه يـاليل بـين الـشـوق والـحب القديم

مـرّت هـواجيسي عـلى صـدري وانـا ضـميتها

واجـر صـوتي باللحون اليا طرق صدري نسيم

لا بـــارك الله بـالـلحون الـلـي مـعـه جـرّيـتها

مـاني غـشيم الّا ذكـي امـحق ذكـيّ الّا غشيم

يـوم انـك تـحاسب خـطاي وغـلطتك عـديتها

الـعـين يـهمل دمـعها والـقلب بـعروقه سـقيم

والـروح صـدت عـن جـميع الناس ما صديتها

انـا لـيا ضـاق الـزمان افـرق غـريمٍ مـن غريم

لــكـن حــبـك مـشـكـله لـلـحين مــا حـلـيتها

انـا سـراجك يـا حـبيب الـقلب فـالليل العتيم

وانـا الـنجوم الـلي لـيا اسـهرك الـغلا خاويتها

وانــا مــلاذك لاغــوى قـلبك بـشيطانٍ رجـيم

وانــا لـبـاس ضـلـوعك الـلـي بـالـغلا عـرّيتها

تـرى الـمسافر مـاهو بـمثل الـمواطن والـمقيم

وانـتـه مـقـيم بـوسـط روحٍ بـالغرام اشـقيتها

يـا مـرحبا بك يالكريم اسكن ثرى قلب الكريم

جـاتـك مـشاعر خـاطري لـو انـك مـا حـيّيتها

الـقلب مـن جـرح الـمحبه لا تحسب انه سليم

تــرى جـروحه بـأسمك الـلي عـاشقه سـميتها

احشم حبيبك يا حبيب القلب محبوبك حشيم

قـــدام لا تــرجـع عــلـى لـعـلّـها يـــا لـيـتـها

وانا اطهر من الغيم وافهم كلمتي وانت الفهيم

لـلحب خـمس فـروض انـا وضّيت ثم صليتها

وهـذي الـقصيده يوم غنووها رياجيل وحريم

رددت خــلـووهـا وخـلـووهـا وانـــا غـنـيـتها

#ساره_الحربي

الثلاثاء الموافق 1440/8/4هـ

تقبلوا تحياتي

نقل وتدقيق مدير كبير